wo jo aata tha kabhi pichhle pahar aata nahin
ek saya sa sar-e-diwar-o-dar aata nahin

aansuon se sinchte hain kisht-e-jaan ye soch kar
khushk ho jaen to pedon par samar aata nahin

yun to ghir ghir ke ghataen aati rahti hain magar
jo barasne wala baadal hai idhar aata nahin

aur chizon ki tarah ye bhi zamin ki den hai
aasmanon se utar kar dida-war aata nahin

kaise andaza laga leti hai duniya dekh kar
dard to mahsus hota hai nazar aata nahin

su-e-manzil faslon ko sath le kar chal diye
hum ne jab dekha ki koi ham-safar aata nahin

ab to yun lagta hai 'nikhat' jaane kyon har aadmi
apne ghar aata hai jaise apne ghar aata nahin