wo jo chahe to ye surat bhi nikal sakti hai
ek duniya mere kashkol pe pal sakti hai

nashsha-e-zulm mein socha bhi nahin tha us ne
koi gardan kisi talwar pe chal sakti hai

dil ko ashkon ki tamazat se bacha le warna
ye wo basti hai jo barsat mein jal sakti hai

jism aisa hai ki faulad bhi sharminda ho
dhup aisi hai ki parchhai pighal sakti hai

ai meri qabr tujhe main ne ijazat de di
teri mitti meri mitti se badal sakti hai

khushk aankhon mein faqat ret nahin wahshat ki
ye zamin apne khazane bhi ugal sakti hai

teri duniya mere masraf ki nahin hai lekin
chalna chahe to mere sath ye chal sakti hai