wo jo mail-ba-jafa lagta hai
ho na ho mujh se khafa lagta hai

kuchh na bolun to hun mujrim lekin
kuchh kahun bhi to bura lagta hai

dil yaqinan hai kisi par mail
dard pahle se siwa lagta hai

zikr us shokh ka jab bhi chhedun
sab kahen aap ka kya lagta hai

ho sake jab na gham-e-dil ka ilaj
dard phir khud hi dawa lagta hai

shokh aanchal mein damakta mukhda
dhup mein phul khila lagta hai

guftugu jaise mahak phulon ki
chaal mein misl-e-saba lagta hai