wo jo mujh se khafa nahin hota
dard had se siwa nahin hota

meri koshish ko jo raza milti
lafz yun be-sada nahin hota

ham-zaban to bahut mile lekin
kyun koi ham-nawa nahin hota

hum agar pahle jag jate to
saneha wo hua nahin hota

aag basti ki gar bujhata tu
us ka ghar bhi jala nahin hota

koi koshish kabhi to ki hoti
tum se kuchh bhi chhupa nahin hota

fikr hoti nahin jo roti ki
koi apna juda nahin hota