wo kaun dil hai jahan jalwa-gar wo nur nahin
is aaftab ka kis zarre mein zuhur nahin

koi shitab khabar lo ki be-namak hai bahaar
chaman ke beach diwanon ka ab ke shor nahin

tajalliyon se pahunchta hai kab use aaseb
sanam-kada hai na aakhir ye koh-e-tur nahin

tere safar ki khabar sun ke jaan dhadkon se
jo pahunchun marg ke nazdik main to dur nahin

koi bhi deta hai ladkon ke hath shisha-e-dil
'yaqin' main ghaur se dekha to kuchh shuur nahin