wo mere sath chala sar se dhup dhalne tak
hawa bhi dost rahi bas charagh jalne tak

kise khabar thi ki suraj ko sham das legi
hamare barf se dil mein lahu pighalne tak

jala jab apna hi ghar apne samne to khula
hamari koshishen sari hain hath malne tak

bata mujhe mere hamdam tu sochta kya hai
main ba-wafa hun faqat rukh tera badalne tak

jahan-e-waqt ki rau mein the sang ki surat
qadam qadam pe lagin thokaren sambhalne tak

sada-e-tirgi 'sattar' sun raha hun main
mera charagh hai raushan lahu ke jalne tak