wo mohabbat na sahi dard-e-mohabbat hi sahi
kuchh to mil jae hamein aap ki nafrat hi sahi

dast-e-qudrat ka banaya hua shahkar to hai
aadmi aaj ka ek harf-e-malamat hi sahi

un ki qismat mein samundar ka sukun likkha hai
apni taqdir mein sahraon ki wahshat hi sahi

shahr mein tere thake panw musafir ke liye
do ghadi baith ke dam lene ki fursat hi sahi

aankh jalte hue lamhon se milana hoga
dil mein biti hui sadiyon ki halawat hi sahi