wo mujh pe taras khaen ye qismat hi nahin hai
main shikwa karun ye meri fitrat hi nahin hai

anjaan bane baithe hain wo bazm mein aise
jaise ki kisi se unhen nisbat hi nahin hai

nikla bhi qafas se to na pahunchunga chaman tak
majbur hun parwaz ki taqat hi nahin hai

ai kash tera qurb jo ho jae mayassar
phir mujh ko kisi shai ki zarurat hi nahin hai

'fayyaz' faqat apne muqaddar se gila hai
un se to mujhe koi shikayat hi nahin hai