wo shakhs yun nigah mein nigah dal kar gaya
bujhi bujhi si zindagi meri bahaal kar gaya

wo sada-lauh tha magar ghazab ki chaal kar gaya
nahin jawab jis ka mujh se wo sawal kar gaya

mujhe to apni justuju us aastan pe le gai
wo dushman-e-wafa na jaane kya khayal kar gaya

aa gaya to zulmat-e-gham-e-firaq chhat gai
jo mehr-o-mah na kar sake tera jamal kar gaya

shikan shikan jabin na kar agar umid-e-khair par
faqir tere dar pe aa gaya sawal kar gaya

qadam qadam pe but-kade rah-e-haram mein the magar
mera bachao zikr-e-rabb-e-zul-jalal kar gaya