wo soz-o-saz wo naghma khayal-o-khwab hua
mita ke hum ko zamana bahut kharab hua

wo shakhs mom ka chehra lagae phirta tha
wo aaj dhup mein nikla to be-naqab hua

harim-e-naz se aai hai qahqahon ki sada
mere sawal ka shayad yahi jawab hua

hazar bar tera shukriya gham-e-dauran
hazar bar hamara hi intikhab hua

khuda gawah koi mujh sa khush-nasib nahin
salib-o-dar pe jab bhi hua hisab hua

chhua jo phul to 'shadan' ulajh gae kante
gulon se hath lagana bhi ek azab hua