wo teri yaad ke lamhe tere khayal ke din
ilaj-e-dard ke zakhmon ke indimal ke din

wo ek rachi basi tahzib apne purkhon ki
wo do ya chaar sahi the magar misal ke din

mujhe to yaad hai ab tak wo kya zamana tha
tere jawab ka mausam mere sawal ke din

har ek pal wo kabhi ruthna kabhi manna
nadamaton ki wo ghadiyan wo infial ke din

main kuchh bhi sun na saki thi wo khauf tha 'shabnam'
use bhi hosh bhala kab tha arz-e-haal ke din