wo umangen nahin ab wo dil-e-nashad nahin
waqia khwab sa kuchh yaad hai kuchh yaad nahin

kaun se zarre pe duniya-e-gham aabaad nahin
dil-e-barbaad hamara dil-e-barbaad nahin

wo ho duniya ki lahad ya ki ho roz-e-mahshar
mubtala-e-gham-e-jaanan kahin aazad nahin

tu jo sargarm-e-tamasha ho dam-e-mashq-e-sitam
kis ko phir shauq-e-shahadat sitam-ijad nahin

pas hai zabt-e-mohabbat ka sitamgar warna
ek nafas bhi mera begana-e-fariyaad nahin

ab to har samt nazar aate hain jalwe jalwe
be-khudi mein koi parda dil-e-nashad nahin

kawish-e-dam-o-qafas mere liye thi goya
warna gulshan hai wahi aaj bhi sayyaad nahin

tabish-e-husn se ek be-khudi chhai pahle
baad us ke hua phir kya ye mujhe yaad nahin

mar ke 'afqar' yahan milti hai hayat-e-jawed
aastan yar ka hai jannat-e-shaddad nahin