wusat-e-chashm ko andoh-e-basarat likkha
main ne ek wasl ko ek hijr ki haalat likkha

main ne likkha ki saf-e-dil kabhi khali na hui
aur khali jo hui bhi to malamat likkha

ye safar panw hilane ka nahin aankh ka hai
main ne is bab mein rukne ko masafat likkha

likhne walon ne to hone ka sabab likkha hai
main ne hone ko na hone ki wazahat likkha

ashk agar sab ne likhe main ne sitare likkhe
aajizi sab ne likhi main ne ibaadat likkha

main ne khushbu ko likha dastaras-e-gumshudagi
rang ko fasla rakhne ki riayat likkha

zakhm likhne ke liye main ne likhi hai ghaflat
khun likhna tha magar main ne hararat likkha

main ne parwaz likhi hadd-e-falak se aage
aur hai baal-o-pari ko bhi nihayat likkha

husn-e-goyai ko likhna tha likhi sargoshi
shor likhna tha sau aazar-e-samaat likkha

itne dawon se guzar kar ye khayal aata hai
'azm' kya tum ne kabhi harf-e-nadamat likkha