wusat-e-daman-e-dil ko gham tumhaara mil gaya
zindagi ko zindagi bhar ka sahaara mil gaya

har dil-e-dard-ashna mein dil hamara mil gaya
para para ho chuka tha para para mil gaya

hum ki maikhane ke waris the hain ab tak tishna-lab
chand kam-zarfon ko sahba ka ijara mil gaya

jis ne khali jam patka us mujahid ko salam
mai-kade mein aaj pyason ko ishaara mil gaya

na-khuda ye donon sahil ek hi dariya ke hain
ye kinara mil gaya ya wo kinara mil gaya

hum ne apne qafile mein us ko shamil kar liya
jo thaka-haara mila jo gham ka mara mil gaya

phir koi isa faraaz-e-dar ki zinat bana
phir kisi tarik shab ko ek sitara mil gaya