ya-ilahi mujhe wo tarz-e-lisani mil jae qabl-e-guftar mere lafz ko mani mil jae tu ne kitnon ke safinon ko kinare bakhshe meri kashti ko bhi ai bahr rawani mil jae beshtar hum teri yaadon ko bhula baithe the kya kare koi jo taswir purani mil jae hum musannif ke tasawwur mein ghute jate hain apne kirdar ko ab koi kahani mil jae dil to sahra ke sarabon se bahal jata hai tu nahin hai to teri koi nishani mil jae kar chuka ho tu gulistanon ko sairab agar ai falak banjh zaminon ko bhi pani mil jae soch tabir ko dar jata hai qalb-e-yusuf chashm-e-piri ko agar khwab-e-jawani mil jae