ya teri aarzu sa ho jaun
ya teri aarzu ka ho jaun

mere kanon mein jo tu kun kah de
main tasawwur sa tera ho jaun

mujh se ek bar zara mil aise
main tere ghar ka pata ho jaun

tu bhi aa jaana kahin rakh ke badan
jism se main bhi juda ho jaun

tod kar mati ye meri phir se
yun banao ki naya ho jaun

ishq ki rasm yahi hai baqi
main bhi ek bar khafa ho jaun

aashnai hai sukhan-goi bhi
aur kitna main bura ho jaun