yaad aate hi rahe dil se nikale hue log
kis ki miras the aur kis ke hawale hue log

shahr-ashob mein aansu ki tarah phirte hain
hae wo log kisi khwab ke pale hue log

awwal awwal to hamari hi tarah lagte the
mansab-e-ishq pe aae to nirale hue log

jaane kis samt unhen talkhi-e-dauran le jae
apni pahchan ko nezon pe uchhaale hue log

ek rut aai ki khushbu ki tarah phail gae
aur phir waqt ki maujon ke hawale hue log