yaad aati hai teri yun mere gham-khane mein
khil uthe jaise gulistan kisi virane mein

apne dil hi mein makin dekha use hum jis ko
dhundte phirte rahe kaba-o-but-khane mein

dil mein the shoala-fishan hasrat-o-arman shab-e-gham
sainkadon shama farozan thin siyah-khane mein

the teri bazm mein sab jam-ba-kaf ai saqi
ek hamin tishna-dahan the tere maikhane mein

tirgi mein bhi raha jashn-e-charaghan ka saman
barq ke shoale farozan rahe kashane mein

mere afsane ko afsana na samjho yaro
hai haqiqat hi haqiqat mere afsane mein

dal di saqi-e-kausar ne azal se 'rifat'
baada-e-ishq-o-mohabbat mere paimane mein