yaad teri falak-e-pir liye baithe hain
shikwa-e-gardish-e-taqdir liye baithe hain

be-asar nala-e-shab-gir liye baithe hain
ek tuti hui zanjir liye baithe hain

mushaf-e-husn ki tafsir liye baithe hain
dil mein hum aap ki taswir liye baithe hain

jaane kab munhadim arkan-e-anasir ho jaen
ret par jism ki tamir liye baithe hain

us ne duzdida nigahon se kabhi dekha tha
dil mein ab tak khalish-e-tir liye baithe hain

naqsh-bar-ab hai dar-asl habab-e-hasti
kab ye mumkin hai jo tamir liye baithe hain

ek hi aah mein barham hai nizam-e-alam
apne nalon mein wo tasir liye baithe hain

zindagi maut hai aur maut hayat-e-jawed
khwab-e-hasti ki ye tabir liye baithe hain

daur-e-hazir mein ghanimat hai bahut ai 'shoala'
aap jo izzat-o-tauqir liye baithe hain