yaadon ki jagir na hoti to main yaro kya karta
gar us ki taswir na hoti to main yaro kya karta

us ke dam se ranjha tha main wo hi meri pahchan bani
wo gar meri hir na hoti to main yaro kya karta

qail karna kaam tha mushkil par wo qail ho hi gaya
lahje mein tasir na hoti to main yaro kya karta

mera kaam tamam tha warna us ke nek irade se
hathon mein shamshir na hoti to main yaro kya karta

andar se main tuta-phuta ek khandar virana tha
zahir jo tamir na hoti to main yaro kya karta

zulmat-e-shab mein raushan 'afzal' ek nanha sa jugnu tha
itni bhi tanwir na hoti to main yaro kya karta