yahan alag se koi kab hisar mera hai
mujhe samete hue khud ghubar mera hai

na chhin paega mujh se koi nuqush-e-khayal
ye phul mere hain ye shakh-sar mera hai

chalun to dhup ka baadal hun main khud apni jagah
rukun to har shajar-e-saya-dar mera hai

padhun to nama kisi ka hai chehra chehra mujhe
likhun to khama haqiqat-nigar mera hai

jagah na de mujhe palkon pe kam nahin ye bhi
ki maujzan teri aankhon mein pyar mera hai

hisar bandh le mujh mein kaha udasi ne
koi na aae yahan ye hisar mera hai

na jaane kab se yahan muntazir tha main ai 'yas'
khabar jab aai wahan intizar mera hai