yahi to waqt hai dil lene ka lagane ka
shabab phir nahin ai dost ja ke aane ka

na aae is pe sitam dekhiye bahane ka
ye abr-o-baad bahana hua na aane ka

latif-o-narm-o-subuk hun nasim ki manind
bura na mane koi mere aane jaane ka

mere shabab ko ya-rab fasana hona tha
kahan wo husn ki unwan ho is fasane ka

maze se shaikh ji angur khae jate hain
hisab hoga kisi roz dane dane ka

khade hain der se masjid ke samne 'mohsin'
zarur bhule hain rasta sharab-khane ka