yan kufr se gharaz hai na islam se gharaz
bas hai agar gharaz to tere nam se gharaz

aish-o-nashat-e-zist hai sab aap se husul
yan shishe se gharaz hai na hai jam se gharaz

tum pas ho agar to barabar hai raat din
kuchh subh se gharaz na hamein sham se gharaz

dil pher dijiye na bigadiye huzur aap
yan bose se gharaz hai na dushnam se gharaz

pad rahne bhar ko dijiye dar par hamein jagah
rahat se kuchh gharaz hai na aaram se gharaz

aankhen dila milin hamein rone ke waste
nakaamiyon se kaam na hai kaam se gharaz

'anjum' ka sher kahne se bikna murad hai
tahsin se kuchh gharaz hai na ilzam se gharaz