yaqin kar le sar-e-sham koi chaara nahin
bina diye ke andhere tera guzara nahin

hamin hain markazi kirdar puchh lo us se
abhi tak us ne kahani mein hum ko mara nahin

badal to di hai har ek chiz us ne kamre ki
magar hamein abhi diwar se utara nahin

hamein khabar hai ki manzil to ek hai lekin
jidhar zamana hai wo rasta hamara nahin

juda hue hain to hum ek ho bhi sakte hain
khala hai darmiyan dariyaon ka kinara nahin

ye raaz khol diya kab ka dasht-o-sahra ne
baghair majnun ke laila tera guzara nahin

tamam ahl-e-adab ki ye rae hai 'dilbar'
ghazal ke fan pe kisi ka koi ijara nahin