us pe jo mere mashware ka kuchh asar lage
us be-zamir shakhs ke shanon pe sar lage

maidan-e-jang mein to main sina-sipar raha
phir kaise itne zakhm meri pusht par lage

is se musafiron ne kiya is tarah suluk
shayad ye khal-o-khad se ab apne shajar lage

ehsas-e-kamtari ka kiya jae kya ilaj
us shakhs ko to har ghadi khud hi se dar lage

us ko agar hai mere takhatub pe ehtijaj
us se kaho ki tarz-e-amal se bashar lage

mujh ko zaruraton ne kahan pe khada kiya
ab zindagi ka aib bhi mujh ko hunar lage

teri zaban dikhati hai urdu ka moajiza
'dilbar' tawil baat teri mukhtasar lage