yaqin ki had ko ja pahuncha jo pahle tha guman apna
wahi mujrim nikal aaya jo thahra raaz-dan apna

meri hasti ka ab ehsas khud mujh mein nahin baqi
dar-o-diwar se main puchhta hun khud nishan apna

dayar-e-ghair mein ummid wo bhi dil-nawazi ki
tasalli dil ko mil jati jo hota ham-zaban apna

tumhaare hijr mein jaanan ye kaisa haal hai mera
na zat-e-la-makan apni na imkan-e-makan apna

hai maqtal mein meri gardan pe khanjar us pari-wash ka
yahi tha mashghala us ka yahi tha imtihan apna

tujhe sahra-nawardi se 'qamar' kitni mohabbat hai
jala dala hai khud hathon se apne aashiyan apna