ye ahd-e-nau ho mubarak tujhe magar saqi
nizam-e-maikada abtar hai ghaur kar saqi

udan tez hai itni ki tham gae manzar
ruka ruka sa hai lamhat ka safar saqi

faza mein tair rahe hain qaza ke jarsume
base hain dasht mein barud ke nagar saqi

jhulas raha hai tassub ki aag mein gulshan
qayamaten hain qayamat se peshtar saqi

pade hain khak pe behosh aadmi-zade
khudai karte hain mahlon mein jaanwar saqi

wo dekh jahal-o-zalalat ki masnad-arai
faraaz-e-dar par latke hain dida-war saqi

kahan wo rind wo paimane aur wo sahba
gae zamanon ki baaten na yaad kar saqi

mujhe khabar hai tere khum mein mai nahin baqi
mere hi khun se ab mera jam bhar saqi