ye bhi kya kam hai ki hum betab haalat mein rahe
ban na pae kuchh bhi lekin dast-e-qudrat mein rahe

hum ko aankhon mein basaya waqt ne manind-e-khwab
aur hum tabir ho jaane ki hasrat mein rahe

hum ne sahra ho ki gulshan ek jaisa kar diya
jis thikane bhi rahe zanjir-e-wahshat mein rahe

ab sila husn-e-amal ka kya mila kya jaaniye
raushni the hum so shoale ki rifaqat mein rahe

khalwat-e-jaan mein badi fursat se aa baitha hai gham
arsa-e-fursat mila to hum bhi fursat mein rahe