ye hikayat tamam ko pahunchi
zindagi ikhtitam ko pahunchi

raqs karti hui nasim-e-sahar
subh tere salam ko pahunchi

raushni ho rahi hai kuchh mahsus
kya shab aakhir tamam ko pahunchi

shab ko aksar kalid-e-mai-khana
shaikh-e-ali-maqam ko pahunchi

shahr kab se hisar-e-dard mein hai
ye khabar ab awam ko pahunchi

pahle do ek qatl hote the
naubat ab qatl-e-am ko pahunchi

sab ka anjam ek jaisa hai
subh-e-raushan bhi sham ko pahunchi

maut bilkul qarib hai shayad
subh ko pahunchi sham ko pahunchi