ye jaante hue ki nadi hai chadhao par
hum bhi chale hain baith ke kaghaz ki naw par

jalte hue nagar ke yahi zimma-dar hain
jo log hath tap rahe hain alaw par

ulfat ke daere na bikhar jaen tut kar
phenka karo na tanz ke patthar bahaw par

chhanw jo apni bant chuka main wo ped hun
be-saya ho ke khud ko lagaya hai dao par

har jism dagh dagh libason ki aad mein
lekin ye e'tiraaz faqat mere ghaw par