ye jo hum apni khanqah mein hain
is ka matlab teri nigah mein hain

thak chuka hun main in se mil mil kar
aur kitne darakht rah mein hain

sher par dad de rahe ho tum
tanz lekin tumhaari wah mein hain

ye jo masti hai gham ka parda hai
qahqahe gum hamari aah mein hain

chand nikla nahin abhi lekin
kuchh sitare charagh-gah mein hain

tum 'fida' kyon nahin hue un par
wo jo ab tak teri nigah mein hain