ye mahakte hue jazbaat ye ashaar ke phul
kash kaam aaen kisi ke mere afkar ke phul

mere dil ne jo saja rakkhe hain zakhmon ki tarah
khil na pae kisi gulshan mein wo mear ke phul

sunghti hain unhen khush ho ke bahishti huren
sarfaroshon ke badan par hain jo talwar ke phul

ye mere ashk-e-nadamat hain khuda ko mahbub
duniya walon ki nigahon mein hain be-kar ke phul

mujh ko tohfe mein ata us ne kiye hain 'hafiz'
kabhi inkar ke kante kabhi iqrar ke phul