ye mana kuchh yahan zaya nahin hai
magar wo masala suljha nahin hai

bhala kaise mohabbat kar len jaanan
hua kya zakhm gar taza nahin hai

mere aansu tumhaare dil ke badle
meri jaan zindagi sauda nahin hai

bade chup-chap rahne lag gae ho
zamane ko abhi parkha nahin hai

kahan se lae ho ye tishnagi tum
hamari aankh mein dariya nahin hai

chalo ab khatm kar den hum ye rishta
hadon ko todna achchha nahin hai