ye manzar dekh kar sahil ki hairani nahin jati
mujhe chhu kar bhi koi mauj-e-tufani nahin jati

pareshani agar hai to pareshani ka hal bhi hai
pareshan-haal rahne se pareshani nahin jati

ye kaise log hain jo aaina pahchan lete hain
ki ab hum se to apni shakl pahchani nahin jati

bahut kanjus hain aankhen meri aansu bahane mein
agarche daulat-e-gham ki farawani nahin jati

gham-e-duniya se pahlu to mera aabaad rahta hai
magar dil hai ki is ki khana-virani nahin jati