ye mohabbat hai dikhawa mat kaho
meri wahshat ko tamasha mat kaho

har kisi ko khizr ka mat nam do
har andhere ko ujala mat kaho

ret mein poshida baithe hain bhanwar
aise sahil ko kinara mat kaho

milna-julna rasm hai par dosto
har ishaare ko bulawa mat kaho

milne aao tum agar mujh se to phir
mujh ko jaana hai khudara mat kaho

us ke halke se tabassum ko 'kiran'
apne zakhmon ka mudawa mat kaho