ye raat kitni bhayanak hai baam-o-dar ke liye
kahan se laun siraj-e-munir ghar ke liye

talab ki rah salamat maqam-e-shauq bahut
takallufat zaruri nahin safar ke liye

jamal-e-yar saza-war-e-jiht-e-khas nahin
ajib marhala dar-pesh hai nazar ke liye

gharib-e-shahr-e-tamanna asir-e-dam-e-firaq
tadap raha hai sar-e-jada ham-safar ke liye

basirat-e-lab-o-lahja na zindagi ka shuur
qarar bhi hai zaruri dil o nazar ke liye

nashat ka rukh-e-raushan dikha gai shab-e-gham
dua ko hath uthaya tha main sahar ke liye

fughan ki jis ne zamane ko raushni bakhshi
charagh dhund raha hai khud apne ghar ke liye

hayat daftar-e-takhliq bhi hai ai 'shatir'
hayat ek muamma bhi hai bashar ke liye