ye taghayyur ru-numa ho jaega socha na tha
us ka dil dard-ashna ho jaega socha na tha

nit nae ragon ki thi jis saz-e-hasti se ummid
wo bhi be-saut-o-sada ho jaega socha na tha

yun sarapa iltija ban kar mila tha pahle roz
itni jaldi wo khuda ho jaega socha na tha

wo talluq jis ko donon hi samajhte the mazaq
is qadar ba-qaeda ho jaega socha na tha

jis 'siraj'-e-ajmali se thin ummiden be-shumar
wo bhi nazr-e-wah-wa ho jaega socha na tha