ye wo jahan nahin jahan aazar hi na ho
gulzar kaun hai wo jahan khar hi na ho

achchha hai un se koi sarokar hi na ho
jin doston mein jauhar-e-isar hi na ho

is bazm-e-shab ke hashr pe rota hai waqt bhi
jo inqilab-e-dahr se bedar hi na ho

mahrumiyon se rang-e-rukh-e-zist zard hai
insan wo kaam ka hai jo bezar hi na ho

meri samajh mein aaega tab irtiqa-e-zist
bazm-e-jahan mein jab koi nadar hi na ho