ye zamin ye chand ye suraj ye tare dekhna
husn-e-nadida ke sare istiare dekhna

ek khabar dena kisi aate hue tufan ki
kashtiyon ko jab kabhi dariya kinare dekhna

january ki sardiyon mein ek aatish-dan ke pas
ghanton tanha baithna bujhte sharare dekhna

jab kabhi fursat mile to gosha-e-tanhai mein
yaad-e-mazi ke purane goshware dekhna

mere mazi ke risalon ko na kho dena salim
ab kahin milte nahin hain ye shumare dekhna