yun apne dil ke bojh ko kuchh kam kiya gaya
ahd-e-visal-o-hijr pe matam kiya gaya

aankhon se khun bahana pada raat din mujhe
tab ja ke tere gham ko kahin gham kiya gaya

kya kam tha pahle darham-o-barham ai aasman
jo aur mujh ko darham-o-barham kiya gaya

chehra tumhaara phul kiya apne ishq se
aur is pe phir pasine ko shabnam kiya gaya

aansu kabhi malal kabhi tera gham kabhi
kya kya na mere zakhm ka marham kiya gaya