yun bhi to sataya hai teri jalwagari ne
aankhen na milain meri baaligh-nazari ne

minnat-kash-e-pindar-e-junun hai dil-e-pur-khun
un ka bhi sahaara na liya be-khabari ne

ai husn-e-dil-ara teri ek ek ada ko
parwan chadhaya meri hairat-nagari ne

thi marhala-e-sakht wo manzil ki jahan par
tum ko bhi sambhaala meri aashufta-sari ne

tum khud hi chale aaoge shayad sar-e-manzil
ek rah nikali hai meri dar-badari ne

ai khastagi-e-ishq chaman mein to guzar kar
phulon ka bhi rakkha hai bharam jama-dari ne

din raat kiye ek wo tufan uthaya
ghunchon ke liye mauj-e-nasim-sahari ne

afsos unhen zauq-e-nazar hi ne giraya
parde jo uthae the meri dida-wari ne

chup hain mah-o-mirrikh zamin hai mutabassim
khincha hai zara tul umid-e-bashari ne

hairat mujhe is par hai 'shahab'-e-sukhan-ara
taka na tujhe waswasa-e-namwari ne