yun bhi to teri rah ki diwar nahin hain
hum husn-e-talab ishq ke bimar nahin hain

ya tujh ko nahin qadr ham-ashufta-saron ki
ya hum hi mohabbat ke saza-war nahin hain

kya hasil-e-kar-e-gham-e-ulfat hai ki majnun
ab dasht-nawardi ko bhi tayyar nahin hain

aksar mere sheron ki sana karte rahe hain
wo log jo ghaalib ke taraf-dar nahin hain

ab tujh ko salam ai gham-e-jaanan ki jahan mein
kya hum se diwanon ke kharidar nahin hain

phir tujh se juda ho ke kahin khud se bichhad jaen
hum log kuchh aise bhi dil-azar nahin hain