yun darakhton ki hai bhar-mar parinde nahin hain
kaha jata hai ki us par parinde nahin hain

jo parinda hai wo thak haar ke baitha hua hai
aur jo udne ko hain tayyar parinde nahin hain

shakh-e-jamhur pe imroz jo qabiz hain yahan
billiyan hain wo khabar-dar parinde nahin hain

aa rahe hain na kaha na ki hain raste mein abhi
hum bhi insan hi hain yar parinde nahin hain

chug rahe hain kisi pardes mein dana-dunka
mausam-e-gul mein bhi is bar parinde nahin hain

tujh samaat ki munderon pe chahakte lekin
mere ashaar hain ashaar parinde nahin hain

badi aasani se uf dam mein aa jate hain ye
bagh-e-dil mein mere hushyar parinde nahin hain