yun na ranj-o-malal kijiyega
yun na jina muhaal kijiyega

jin ka koi jawab mumkin ho
hum se aise sawal kijiyega

hum ne ho aap ka bura chaha
pesh koi misal kijiyega

log pad jaen jis se hairat mein
aisa bhi kuchh kamal kijiyega

hum ki sambhle hain sakht mushkil se
ab na paida wabaal kijiyega

jis se mazbut dil ke rishte hon
wo talluq bahaal kijiyega

ji rahi hai ye kaise 'robina'
apni kuchh dekh-bhaal kijiyega