yun shor-o-shar ke sare talabgar so gae
sannate chikhne lage bazar so gae

palkon pe bojh ban gain jab din ki raunaqen
aankhon mein bhar ke khwab giran-bar so gae

diwar-o-dar bhi apni marammat se tang the
gir jae ab makan ki meamar so gae

suraj ke sath tu bhi lahu ro ke dub ja
ai sham-e-hijr tere parastar so gae

'ashhar' kisi ke qurb-e-hawasnak se gharaz
apna bhi dil tha bhinch ke ek bar so gae