yusuf-e-husn ka husn aap kharidar raha
pahle bazar-e-azal misr ka bazar raha

bismil-e-naz raha kushta-e-raftar raha
zindagi bhar mujhe marne se sarokar raha

jurm-e-na-karda uqubat ka saza-war raha
shaikh sarshaar-e-siyah masti-e-pindar raha

parda-e-chashm jo pas-e-adab-e-yar raha
main raha samne tu bhi pas-e-diwar raha

dil ye shadi-e-jarahat se hua baalida
ki tera tir yahan ta-lab-e-sufar raha

gir ke nazron se teri phir na zamin se uttha
main subuk bhi jo hua tu bhi giran-bar raha

aaj hi aaj hai farda-e-qayamat maujud
do ghadi aur jo hangama-e-raftar raha

tur tu barq-e-tajalli se hua khakistar
aur main sokhta-e-hasrat-e-didar raha

rahm us sada-dili par ki mera zakhm-e-jigar
ghair se chaara-o-darman ka talabgar raha

main wo ek mujrim-e-tazir talab hun ki sada
badle dushman ke uqubat ka saza-war raha

bas-ki dil mein rahi ek kashmakash yas-o-ummid
dard jo dil mein raha jaan se bezar raha

ab wo farda bhi nahin roz ki taskin ke liye
ab faqat hashr hi par wada-e-didar raha

pi bhi ja shaikh ki saqi ki inayat hai sharab
main tere badle qayamat mein gunahgar raha

khush hun chup rahne se un ke dam-e-paigham-e-visal
ki ye inkar to kuchh shamil-e-iqrar raha

sar pe phirta hi raha aur na gira mujh pe kabhi
aasman ban ke tera saya-e-diwar raha

garche kya kuchh the magar aap ko kuchh bhi na gina
ishq-e-barham zan-e-kashana-e-pindar raha

tum ne yun ghar mein to kya kuchh na uthae fitne
ek qayamat ka uthana sar-e-bazar raha

hae wo chashm ki dekhe tujhe sargarm-e-ada
wae wo dil ki tera mahram-e-asrar raha

main raha bhi to raha khar ki surat ki sada
teri nazron mein subuk-dil pe tere yar raha

chashm par nashsha-e-saqi jo rahi aks-fagan
chur masti se har ek saghar-e-sarshaar raha

hun mein wo jins ki hun raunaq-e-bazar-e-kasad
hun wo sauda ki kharidar bhi bezar raha

kuchh khabar hoti to main apni khabar kyun rakhta
ye bhi ek be-khabari thi ki khabar-dar raha

thak ke baithe ho dar-e-sauma par kya 'anwar'
do-qadam aur ki ye khana-e-khummar raha