zaban kar ke muqaffal tum sadaen chahte ho
saza dete ho pahle phir du'aen chahte ho

ghutan hai dard hai dil mein chhupi tanhai hai
sisakti hai mohabbat tum adaen chahte ho

kiya barbaad qudrat ko kuchal dala magar ab
mahakti si fazaen aur ghataen chahte ho

simat kar zat mein apni qafas mein qaid ho kar
tumhein parwaz ki zid hai hawaen chahte ho

suno khud-gharziyon ki koi to ho intiha na
jafa kar ke hamin se tum wafaen chahte ho

zamin aur aasman aae na tum ko ras 'mita'
nahin hairat ki ab tum bhi khalaen chahte ho