zahid nahin masjid se kam hurmat-e-mai-khana
maston ki jamaat mein mehrab hai paimana

kyun zulf teri uljhi rahti hai ai jaanana
hazir hai dil-e-sad-chaak darkar ho gar shana

dekhe jo teri surat ho jae hai diwana
hai aks se tujh rukh ke aaina pari-khana

is dil ka mere jalna rakhta hai wo kaifiyyat
dekhega jo parwana ho jaega mastana

ek naqd-e-nigah par 'ishq' bikta hai to kar sauda
de bahr-e-kharidari didar ka baiana