zakhm agar gul hai to phir us ka samar bhi hoga
hijr ki raat mein poshida qamar bhi hoga

hausla dad ke qabil hai yaqinan us ka
us ko malum tha dariya mein bhanwar bhi hoga

kaun sunta hai yahan past-sadai itni
tum agar chikh ke bolo to asar bhi hoga

kuchh na kuchh rakht-e-safar pas bacha kar rakhna
ek safar aur pas-e-khatm-e-safar bhi hoga

mutmain rahiye yunhi khud ko tasalli dije
yahi jina yahi jine ka hunar bhi hoga

umr guzri hai isi ek tamanna mein 'nadim'
mujh se be-ghar ka kahin shahr mein ghar bhi hoga