zakhm-e-dil achchha hua pahlu badal jaane ke baad
dil ki dhadkan mit gai aansu nikal jaane ke baad

wada-e-rangin se hoga hae kya khak ehtimam
aarzu ke phul chutki se masal jaane ke baad

kya karen khun-e-tarab ki surkhi-e-afsana ko
rang-o-bu ki raegan ghadiyon ke tal jaane ke baad

mai undeli bhi jo minaon mein saqi ne to kab
shisha-ha-e-rang se mausam nikal jaane ke baad

dhundte phirte hain khud dair-o-haram ke pasban
hosh-mandan-e-khirad ka dam nikal jaane ke baad

kaun afsurda jawani ko jila dega 'khizar'
ahd-e-naw-nosh ki shamen pighal jaane ke baad